थंडीत फिरायला जाण्याचा प्लॅन बनवताय? जाणून घ्या ‘या’ सर्वोत्तम ठिकाणांबद्दल…

हळूहळू थंडी वाढत असल्याच जाणवू लागलं आहे. थंडीचा महिना फिरण्यााठी बेस्ट मानला जातो. या महिन्यात जणू निसर्गाचे सौंदर्य आणखीनच खुलते. जर तुम्हाला फिरण्याची आवड असेल तर देशातील ही पाच पर्यटन स्थळ तुम्हाला माहित असायलाच हवीत. जिथे तुम्ही हिवाळ्यातील सुट्यांचा मनसोक्त आनंद घेऊ शकता अशी पर्यटन स्थळ कोणती? चला तर मग या माध्यमातून आपण या स्थळांबद्दल जाणून घेऊयात. (Planning a winter trip? Know about ‘these’ best places…)

पहिलं स्थळ आहे बेटवा नदीच्या काठावर वसलेले ओरछा. हे सुंदर आणि ऐतिहासिक ठिकाण, कोरलेली मंदिरे आणि भव्य राजमहालांसाठी प्रसिद्ध आहे. बुंदेल राजपूत प्रमुखाने १५०१ मध्ये बुंदेलांची राजधानी म्हणून याची स्थापना केली होती. इथे गेल्यास राजा राम मंदिर, लक्ष्मी नारायण मंदिर, जहांगीर महल अशी सुंदर ठिकाणे पाहायलाच हवीत. या शहराला राजवाड्यांचे शहर म्हणूनही ओळखले जाते.

दुसरं स्थळ आहे मुन्नार, निसर्गप्रेमींसाठी दक्षिण भारतातील मुन्नार हे शहर एखाद्या रत्नासारखे आहे. मुन्नार शहर हे पूर्णपणे हिरवळ असल्यामुळे असे म्हणतात की, केरळ ट्रिपदरम्यान तुम्ही मुन्नारला गेला नाही, तर कुठेच गेला नाही. चहाच्या बागा, विदेशी वनस्पती आणि प्राणी, धुके असलेला परिसर आणि धबधबे हे ठिकाण विस्मयकारक बनवतात.

हिवाळ्यात हे ठिकाण अतिशय सुंदर दिसते. येथील तापमान ११ अंश सेल्सिअसपर्यंत घसरते. थंड वातावरणाचा आनंद घेत तुम्ही ट्रेकिंग, रॅपलिंग आणि अगदी रॉक क्लाइंबिंगलाही जाऊ शकता. केरळमधील सर्वात प्रसिद्ध पर्यटन स्थळांपैकी एक असल्याने, मुन्नार हे मोठ्या संख्येने पर्यटकांना आकर्षित करते आणि ते केरळमधील सर्व प्रमुख शहरांपासून चांगले जोडलेले आहे.

त्यामुळे, तुम्हाला भारतातील कोणत्याही शहरातून किंवा जगातील इतर कोणत्याही देशातून मुन्नारला भेट देण्याची योजना आखता येते.तिसरे स्थळ आहे हंपी, युनेस्कोच्या जागतिक वारसा स्थळात समावेश असलेले हंपी हे कर्नाटक राज्यातील दऱ्या आणि टेकड्यांमध्ये वसलेले अवशेषांचे शहर आहे. इतिहासप्रेमींसाठी आणि गर्दीपासून दूर राहायला आवडणाऱ्यांसाठी हे एक खास ठिकाण आहे.

विजयनगर साम्राज्याचे सुमारे 500 प्राचीन स्मारके, सुंदर मंदिरे आणि नयनरम्य अवशेष येथे पाहायला मिळतात. हिवाळ्यातील आल्हाददायक वातावरणासोबतच येथील पुरातत्वीय चमत्कार तुम्हाला थक्क करतील! तुम्ही सुंदर विरुपाक्ष मंदिर, मातंग टेकडी आणि विठ्ठला मंदिराला भेट देऊ शकता. तसेच, कटपुतली कार्यक्रम, मंदिर परेड, शास्त्रीय नृत्य सादरीकरण आणि कर्नाटक संस्कृतीशी साम्य असलेल्या शास्त्रीय संगीताचा आनंद देखील तुम्ही घेऊ शकता.

चौथे स्थळ आहे नागालँड, हिवाळ्यात नागालँडमध्ये प्रसिद्ध हॉर्नबिल उत्सव साजरा केला जातो, जो 10 दिवसांचा उत्सव आहे. हा उत्सव आदिवासी लोकांच्या जीवनावर प्रकाश टाकण्यासाठी आणि आंतरसांस्कृतिक सौहार्द वाढवण्यासाठी केला जातो. याशिवाय, हा ऋतू पर्यटकांसाठी योग्य मानला जातो, ज्यामध्ये ते येथील दऱ्या आणि संस्कृती अधिक चांगल्या प्रकारे एक्सप्लोर करू शकतात.

पाचवे आणि अखेरचे स्थळ आहे लक्षद्वीप, बीच प्रेमींना हि जागा आवडणारी आहे. पांढरा वा लुकामय समुद्रकिनारा, आल्हाददायक हवामान आणि लक्षद्वीपची प्रसन्नता. लक्षद्वीपच्या प्रवाळ खडकांच्या सौंदर्याचा, क्रिस्टल स्वच्छ पाण्याचा आणि रात्रीच्या वेळी जॅमिंग सत्रांचा आनंद तुम्ही घेऊ शकता. खरंच, लक्षद्वीप हे भारतातील हिवाळ्यात फिरणाऱ्या ठिकाणांमध्ये सर्वोत्तम ठिकाणांपैकी एक आहे. ही आहेत काही अविस्मरणीय ठिकाण जिथे तुम्ही हिवाळ्यात नक्कीच फिरायला जाऊ शकता.